ལོ་གསུམ་གྱི་ཚེས་བཅུའི་སྒྲུབ་པ་གར་འཆམ་སོགས་བཙུགས་གནང་སྟེ། ནམ་བྱར་གྱི་ཟླ་བ་ལྔ་དགོན་གནས་དེ་ཁར་བཞུགས་བཞིནམ་ལས་ནམ་དགུན་ལུ་ཤར་ལྕགས་འགྱེད་དབྱངས་ཅན་དགའ་བའི་ཚལ་ལུ་བྱོན་ནིའི་སྲོལ་བཙུགས་ཏེ་གདུང་བརྒྱུད་བླ་རབས་རིམ་བྱོན་ཚུ་གིས་བསྐྱངས་དོ་ཡོདཔ་ཨིན། ཨིན་རུང་ཤུལ་ལས་གདུང་བརྒྱུད་ཀྱི་གྲས་ལས་བླམ་མཛད་མི་རྒྱུན་ཆད་སོངམ་ལས། དབྱིན་ལོ་ ༢༠༠༧ ལོར་སྐྱབས་རྗེ་ཁྲི་རབས་ ༧༠ པ་སྤྲུལ་སྐུ་འཇིགས་མེད་ཆོས་གྲགས་མཆོག་གིས་གཏེར་སྟོན་ཚེ་རིང་རྡོ་རྗེའི་སྤྲུལ་སྐུའི་རིགས་རུས་ལས་བརྒྱུད་པའི་མཁན་པོ་པ་སངས་ཚེ་རིང་ལུ་གདན་ས་འདིའི་ཆོས་བརྒྱུད་འཛིན་མིའི་བླམ་སྦེ་བསྐོ་བཞག་གནང་ནུག

མཁན་པོ་མཆོག་གིས་ཆོས་བརྒྱུད་འདིའི་དབང་ལུང་ཁྲིད་གསུམ་སོགས་གསན་ཏེ་ཟབ་ཆོས་འདིའི་བསྐྱེད་རྫོགས་ཀྱི་ཉམས་བཞེས་ཚུ་ཚུལ་བཞིན་བསྒྲུབས་ཏེ། སྔར་སྲོལ་གྱི་མཐོང་བ་བརྒྱུད་པའི་ཆོ་ག་ཕྱག་ལེན་སོགས་སྦྱངས་བརྩོན་གྱིས་རྒྱུན་མ་ཉམས་པར་བཞག་པ་མ་ཟད། དགོན་པ་དེ་ཁར་དགེ་འདུན་གྱི་སྡེ་ཐོག་མར་རྡོར་གླིང་སློབ་གྲྭ་ཞེས་པའི་མཚན་གསོལ་ཏེ་དགེ་འདུན་པ་ཞལ་གྲངས་ ༣༣ དང་བླ་སློབ་བཅས་གསར་དུ་བཙུགས།

སླར་ཡང་དབྱིན་ལོ་ ༢༠༡༤ ལུ་དྭངས་ཆུ་དོན་གྲུབ་ཆོས་གླིང་རྡོར་གླིང་དགོན་འཛིན་གྲྭ་ཚང་དབུ་བརྙེས་ཏེ་ཕྱིའི་ལྷ་ཁང་ཉམས་བཅོས་དང་གྲྭ་ཤག་གསར་བཞེངས་སོགས་དང་། ནང་དགེ་འདུན་པ་ཞལ་གྲངས་ ༥༥ ལྷག་ཙམ་དང་བླ་སློབ་ ༨ བཅས། སློབ་གྲྭ། གྲྭ་ཚང་། བཤད་གྲྭའི་རིག་གནས་དབྱིན་སྐད་སོགས་ཀྱི་སློབ་སྦྱོང་དང་། གྲྭ་ཚང་གི་སྐུ་མཆོད་འབུམ་སྡེ། སྔར་སྲོལ་ལམ་ལུགས། ལོ་གསུམ་རེ་ལུ་ཚེས་བཅུའི་གར་འཆམ་སོགས་སྔར་ལས་ལྷགཔ་སྦེ་ཡར་རྒྱས་གཏོང་བཞིན་དུ་ཡོད་པའོ།།